مشترياتى الجديدة من شانيل و ايسنس و ماركات تانية

السلام عليكم 

ازيكم يا صبايا ان شالله تكونو بخير جميعآ جيبالكم مشترياتى الجديدة كلها بالصور و تقييمى ليها .

اولا : الفاونديشن

من الشمال شانيل حلو جدا تغطيته متوسطة انصح بيه للبشرة المختلطة و الدهنية و هو fluid (سائل ) اعطيه 9 من 10 

و اللى بعده من ديبورا اسمه ديبورا مات  و درجته ايفورى 00 تغطيته من متوسطة لعالية و مطفى جدا بدون اى لمعة و كريمى الى حد ما مش سائل زى شانيل اعطيه 9 من 10

و اخر واحد ده موس فاونديشن من اماندا بحبه جدا تغطيته مش عالية لكن لونه واضح و ثابت بيتحول طبعا لشكل بودر بعد ما يتحط اعطيه 10 من 10 .

   ثانيا : الآى شادو

 دى علبة شادو كبيرة من ديبورا و فيها بلاشر لونين و برونزر

دى و هى مفتوحة كلها و ده شكلها من جوا احسن حاجة فيها ان فيه

 كل الدرجات الترابية و فيها مجموعة الوان للسموكى

 الاسود و فيها درجات روز و اورانج حلوة اوى بس بتحتاج برايمر عيون عشان اللون يظهر واضح

تقييمى ليها 8 من 10

ثالثا : الليب ستيك و الجلوس

دى بقى مجموعة ليب ستيكس بحبها كلها و كلها احلى من بعضها

من اليمين دول لونين من ايسنس احمر و كاكاوى كريمى حلوين جدا و ثباتهم معقول جدا لو مكلتش او شربت مبيطلعوش ابدا

اللى بعده فوشيا غامق من لوريال احلى ليب ستيك ممكن اى وحدة تستعمله فى قوامه الكريمى التقيل و الوانه الغنية و ريحته 10 على 10

اللى بعده فوشيا فلاش من ميبلين برضو حلو اوى و قريب من لوريال و ارخص كمان كتير نص التمن تقريبا

 و الاربعة الاخيرة دول من اماندا فوشيا و اورانج هادى و بنى و الاخير ده روز هادى بموووووت فى درجة الاورانج دى اسعارهم مش  عالية ثباتهم حلو و مرطبين للشفايف و كريمى

دول بقى الجلوسات و كلهم ايسنس

انا مش من هواة الجلوس اوى لكن جربتهم و حبيتهم

لما بحب احط ميك اب هادى اوى الصبح بستخدمهم

روز فاتح و ده مات

و اللى بعده فوشيا بجليتر

و اللى بعده اورانج قوامه تقيل

تقييمى ليهم 8 من 10

رابعا :الماسكرا و اقلام العيون

دى ماسكرا شانيل بس مش باينة اوى فى الصورة دى

دى و هى مفتوخة ده شكل فرشتها

كويسة بس مبحبهاش اوى المفروض انها بتطول و تكثف الرموش بس محستش ده اوى

بالنسبالى فى ارخص منها كتير و احسن منها

تقييمى ليها 7 من 10

دى اقلام الكحل و الاى برو

الاول من اليمين شانيل اسود حلو جدا بس مش فاحم

و ثباته حلو هو long lasting

 الاتنين اللى بعده ماركة miss&mrs

ماركة ممتااااااااازة بتنباع فى الخليج لون اسود فاحم جداااا

و اللى بعده اخضر ميتالك ثباتهم عااااالى 10 على 10

و الاتنين اللى بعدهم من فلورمار مش بستخدمهم كتير لبنى و بنفسجى ثباتهم مؤقت

اللى بعده ده قلم الحواحب المفضل عندى من سيبال

لونه بنى فاتح و مكتوب عليه انه باودرى

يعنى بيدى تأثير الباودر عالحواجب مش بيسيح و يبقى شكله ملزق

زى باقى الاقلام

و الاخير ده قلم بنى ميتالك من اماندا بيسيح و مش حلو محبتهوش

اده سواتش ليهم بترتيبهم

دول بقى اتنين شادو من حورادانا جبتهم لما قالولى فى المحل

ان ثياتهم عالى هم لونين كريمى و سيمرى فيهم لمعة حلوة اووووووى بس لازم تحتهم بودرة عشان يثبتو

دى الوان المانيكير اللى عندى كلها مجبتهمش مرة وحدة

اول اتنين عاليمين دول من لوريال حلوين اوى و قوامهم ممتاز طبقة وحدة كفاية احمر و فوشيا

اللى بعدهم دول ايسنس كلهم شكل واحد الاول ده روز بس فاتح جدا كأنك مش حاطة حاجة و اللى بعده اورانج روعة و اللى بعده موف لامع على ازرق كدة بيدى ضى موف و اللى بعده جليتر دهبى و اللى بعده جليتر فوشيا و اللى بعده ابيض خفيف

و ده احمر غامق او نبيتى كدة من مافالا حلو اوى اوى

و الاتنين اللى وراه دول مانيكير كراكى من اماندا فضى فى ازرق

.و ده توب كوت من اسينس

دول الباودر بتوعى عاليمين من جوردانا و عالشمال من اماندا بتاع جوردانا انعم عالوش من اماندا بس الاتنين حلوين اوى

دول بلاشرز اللى عاليمين من ايسنس برونزى و اللى عالشمال روز هادى من سيبال بحبه جدا عشان انا بيضة و بيدينى خدود وردية طبيعية و دايما بستخدمه عشان كدة قرب يخلص و دول كنت جيباهم من فترة

الاتنين حلوين اوووووى و تقييمى ليهم 9 من 10

شاركونى ارائكم و تعليقاتكم و متنسوش تعملو join

و لو فى اى استفسارات حابين تعرفوها انا هرد على كل حاجة .

متحاولش تبقى حد تانى غير نفسك خليك واثق فى نفسك

الحلقة الاولى 

خليك واثق فى نفسك خجلك و خوفك من الناس سببه ضعفك ... ايـــــــــوة ضعفك طول ما انت ضعيف هتخاف تتقدم خطوة
لتطلع غلط هتخاف تعامل الناس لتغلط فى الكلام يتريقو عليك هتخاف تبتسم لمجرد ان اول ما بتبتسم بتلاقى عيون اللى قدامك على ابتسامتك
ايوة ايوة انا عارفة شعـــــــــــورك بالظبط و حاسة بيك ..... بس احب اقولك كل دى خيالااااااات الشيطان بيقنعك بيها و انت لانك ضعيف بتصدقه
و طول ما انت خايف تتصرف و تتحرك عشان هيضحكو عليك هم فعلا هيضحكو عليك لان ضعفك بيبان فى تصرفك و الذكى هو اللى هينتهزها فرصة بقى و يستفزك و يضايقك و يقلل منك , طبعااااااااااا .... اومال انت فاكر ايه!!!
ابدأ من دلوقتى حالا
بتخاف من الناس ؟؟
اسال نفسك ليه ؟ فيك ايه اقل منهم ؟ تفرق ايه عنهم؟
بتخاف تتكلم ليضحكو عليك؟
ما يضحكو ... هياخدو كلامك بهزار ؟ ياخدوه بهزار و ايه المشكلة ؟ هزر فيه انت كمان اوعى تثور اوعى تزعل اوعى تضعف
انت فى داخلك قوى و كلنا اقوياء عارف ليه ؟؟ لان عندنا ( رب اسمه القوى و انت عبد القوى فأنت قوى ) 
طول ما انت مع الله انت بتستمد قوتك منه هو قالك و ان شكرتم لازيدنكم أشكره و هيزيدك ولا زم تكون مقتنع بأنك لو شكرته هيزيدك لازم تكون مؤمن بكل خطوة بتعملها لانه سبحانه و تعالى برضو قال " و كان حقا علينا نصر المؤمنين "
المؤمن مش مقصود بيه المؤمن بس بالله المؤمن بفكرة و سعى فى خطوات صحيحة للوصول اليها 
المؤمن ببراعته فى عمل شىء حتى لو كل الناس اتهمته بالفشل بس هو مؤمــــــــــــن ربنا حينصره عليهم
و محدش يعنى اتفق عليه الناس ده ربنا نفسه الناس اختلفت عليه هيجتمعو عليك انت !!! لو بتفكر كدة يبقى عمرك ما حتوصل لشىء .
لا و كمان ايه ... الايمان درجات و على أد ايمانك هتاخد (المؤمن القوى خيرا من المؤمن الضعيف )
اسعى للى انت عايزه لو شاطر فى رياضة معينه ألعبها و اجتهد فيها و اتدرب كتير و يمكن توصل للعالمية اللى وصلها مش احسن منك .
لو شاطر فى الرسم فى العزف فى الغنى فى الكتابة قوم اتحرك خد ورقتك و قلمك خد عودك خد جيتارك اعزف و املا الدنيا فرح قول للناس انا اهو
انت تستحق تكون واحد من اشهر الناس فى العالم
كلنا نقدر نوصل بس لو عندنا ارادة حقيقية كلنا عندنا افكار و مشاريع بس كم واحد قام و نفذها ؟؟
و حتى لو جربت و منجحتش جرب تانى و تالت و رابع لحد ما تنجح صدقنى انت تقــــــــــدر
عندك مثال :
السيدة هاجر كانت فى صحراء مكة القاحلة لا معاها انيس ولا رفيق بس معاها ابنها الرضيع فى مكان لا زرع فيه ولا ماء كان ابنها حيموت من الظما و هى كمان لا معاها زاد ولا ماء و كانت عارفة انها فى صحراء مفيهاش ماء بس لم تيأس طلعت جبل الصفا و نزلت و طلعت جبل المروة و فضلت تنزل و تطلع من هذا الجبل لهذا الجبل عشان كدة ربنا فجرلها عين ماء (ماء زمزم) السيدة هاجر خدت بالاسباب و حاولت و عملت اللى عليها عشان كدة ربنا رزقها من حيث لا تحتسب .
لو انت بقى ... كنت قعدت فى مكانك و استسلمت للموت لانك ضعيف
 اوعى تستلم ابدا اوعى تيأس ربك اسمه الرزاق و اسمه الرحيم 
اعمل اللى عليــــــــــــــــــك و انسى الناس متفكرش فى الناس لانك كدة كدة مش هتعجب كل الناس 
(انتقل من عبادة العباد لعبادة رب العباد ) يعنى ايه ؟؟
هقولك يعنى ايه....... لو عملت حاجة عجبت الناس و كان رأيهم فيك ايجابى و حسيت انه رفعك و انك مبسوط اوى بكلامهم اعرف ان فيك حاجة غلط و انك كدة بتعبدهم و لو رأى الناس فيك سلبى و حسيت انه قلل منك اعرف انك غلط و انك كدة بتعبدهم هم اللى بيحركوك مش ايمانك بنفسك و بربك هو اللى بيحركك الشخص الواثق من نفسه أحد صفاته : انه مبيتأثرش بكلام الناس الايجابى او السلبى ... اه والله.
ربنا بيقول انا عند ظن عبدى بى فليظن بى ما يشاء .... لما تقول فى نفسك انا فاشل و هو ربنا خلقنى كدة و هو عايزنى كدة اعرف انك هتتحاسب و لما تظن فى نفسك انك شخص ناجح و ان ربنا مقويك و بتقدر توصل للى انت عايزه برضو هتتحاسب بس الفرق بين الاول و التانى ايه الاول ظن فى ربنا ظن السوء لم يسعى لان يكون شىء فربنا هيحاسبه 
و التانى ظن فى الله الخير و انه قادر على فعل ما يريد طول ما هو مش بيغضب الله ربنا حيكافئه على حسن فهمه و على تعبه و عمله
اومال كنت فاكر ايه !!!
                       يتبع